"Die huidige strafregstelsel is ’n sinkende skip wat nie gered kan word nie en alternatiewe maniere van vervolging soos privaatvervolging gaan al hoe belangriker word in die stryd om geregtigheid."

Die bogenoemde was die mening van kundiges wat op 18 Oktober 2021 aan AfriForum se konferensie oor die verval van die strafregstelsel deelgeneem het. Tydens die konferensie het Adv Gerrie Nel gesê: “Daar is ’n algehele gebrek aan erns by die Nasionale Vervolgingsgesag (NVG) om sake te wil afhandel en duidelik ook ’n gebrek aan kundigheid en kundige ondersoekers om sake te ondersoek.”

Nel het ook gesê: “Die voeteslepery en vertragings in sake by die NVG bevestig dat mense nie gelyk voor die reg is nie. Die NVG se onvermoë en weiering om individue met politieke bande te vervolg, is tekenend dat hulle na die pype van hul politieke meesters dans. Dit het tot gevolg dat mense vertroue in die regstelsel verloor en eenvoudig moed opgee in hul soeke na geregtigheid. Die NVG en die polisie hoop dikwels dat klagtes net sal verdwyn. Die privaatvervolgingseenheid gaan egter aanhou om hul tot verantwoording te roep.”

In Februarie 2022 Skryf Adv. Glynnis Breytenbach - DA LP) in Rapport “Die nasionale vervolgingsgesag (NVG) het in ’n stadium lank, lank gelede, tussen omstreeks 1990 en 2012, ’n bloeitydperk beleef. Wat oorgebly het is ’n skaduwee van die NVG van vroeër, ’n instelling nou diep geskaad deur politieke inmenging en onbeskryflike swak werwingsmetodes en ’n ernstige gebrek aan onafhanklikheid en integriteit. Almal is bang om enigiets hardop te sê oor ongerymdhede – bang hulle is dalk hul werk kwyt.

In die onlangse verlede was daar baie vrae oor kwessies in die strafregstelsel: 

• Die onsuksesvolle Gupta uitlewering vanuit Dubai. Wie het verbrou in die saak? 
• Die onlangse uitspraak in die Nulane Investment en Gupta verwante saak in die Vrystaat waarin al agt beskuldigdes in die bedrogverhoor vrygespreek is. Die staat het aangedui dat hulle gaan appelleer. Kan die staat die keer suksesvol wees?
• Suid-Afrika se standpunt en ommeswaai oor onttrekking aan die Internasionale Strafhof. Is SA nie besig om sy Nasionale en internasionale aansien ten opsigte van vervolging in te boet nie?
• Waarom die eindelose stryd om voormalige President Zuma aanspreeklik te hou en die aanhoudende uitstel van sake. Is sommige mense nie meer gelyk voor die reg as ander nie?   
• Kan van die kwessies in die Zondo verslag later moontlik privaat vervolg word?
• Kan die omvang van korrupsie in Suid-Afrika suksesvol deur vervolging aangespreek word?
• Suid-Afrika is uitgelewer aan misdadigers – Graskop voorval waar die hele dorp deur ʼn rampokker bende gyselaar gehou is met onbevoegde polisie. Wat moet gebeur om wet en orde toe te pas? 
• Wat moet by die NVG gebeur om al bogenoemde te kan hanteer of regstel? Kan dit reggestel word? 

Adv Gerrie Nel, hoof van AfriForum se private vervolgingseenheid, gesels oor dié en vele ander kwessies in die strafregstelsel in die volgende AB in dialoog webinaar.

 Kom luister en gesels met Adv. Gerrie Nel op Woensdag 24 Mei 2023 om 17:30. U is welkom om vooraf vrae stuur na kommentaar@abond.co.za

 Webinaar registrasie  

Volg die skakel om te registreer: https://us02web.zoom.us/webinar/register/WN_Y2u9bFFsSdupFmaeODcxvQ