Terug na Desember  2021 - Kerswense Nuusbrief Indeks

Jesus bring Hoop in wanhoop

“Om dié rede bly ek hoop: deur die liefde van die HERE het ons nie vergaan nie; daar is geen einde aan sy ontferming nie, dit is elke môre nuut. U trou is groot. Ek sê vir myself: Die HERE is my lewe! Daarom hoop ek op Hom” (Klaagl.3:21-24).

Dit klink onmoontlik om in tye van wanhoop oor hoop te praat. In die straat waarin ek gereeld van my huis af in Stellenbosch inry, is daar ’n banier teen ’n muur met die woorde: “Jesus Gives Hope”. Net langsaan is daar ’n ruimte langs die straat waar baie mense van Kayamandi gaan sit en wag, indien iemand hulle dalk vir ’n werkie wil oplaai.

As jy stilhou dan storm hulle om in jou motor in te klim. My hart breek elke keer as ek dit sien. Vir baie is dit dalk die laaste hoop om dalk iets te kan kry om die aand huistoe te vat vir ’n honger gesin.

Dan wonder ek hoe voel hulle as hulle na die banier kyk? Hoe versoen hulle die toestand van wanhoop met ’n boodskap van hoop? Hoe bring jy die twee ente van die tou bymekaar?

Jeremia het die boek Klaagliedere geskryf toe die godsvolk weggevoer is in ballingskap in Babel. Jerusalem is ’n puinhoop. Die tempel is verwoes, die muur is stukkend en huise is platgeslaan en afgebrand. Die einde het aangebreek (4:18b). Daar is geen hoop meer nie.

En hier, in die middel van die boek Klaagliedere kom skryf Jeremia van hoop te midde van wanhoop. Hy bevind hom self in die uiterste toestande (vgl.3:19). Maar dan skep hy moed. Hy kyk by die slegte dinge verby en hy sien die liefde van die HERE wat nooit vergaan nie, en sy ontferming waaraan daar geen einde is nie. Dit is elke môre nuut (3:22,23). 

Die woorde op die banier: “Jesus Gives Hope”, bring dan ’n nuwe boodskap. Jesus gee hoop al het jy geen hoop meer nie. Hy gee steeds hoop al het jy geen werk nie, al is jy honger en dors, arm en alleen. Sy liefde en ontferming is die twee bene waarop jy kan staan en niemand sal jou voete onder jou kan uitslaan nie. 

Dis ook die boodskap wat Kersfees 2021 vir ons bring. Ons staan in die middel van baie slegte tye en omstandighede. Skryf maar hier in wat is die dinge wat jou bang maak, wat jou moed en hoop laat verloor. 

Maar in hierdie donker waarin jy sit skyn die helder lig van God se liefde op ’n Kind wat vir ons gebore is. En ons hoor die boodskap: “Só lief het God die wêreld gehad dat Hy sy Seun gegee het, sodat elkeen wat in Hom glo, nie verlore sal gaan nie, maar die ewige lewe sal hê” (Joh.3:16). En saam met die herders hoor ons die blye aankondiging van die engel: “Vandag is daar vir julle die Verlosser gebore, Christus die HERE. En dit is vir julle die teken: julle sal ’n Kindjie vind wat in doeke toegedraai is en in ’n krip lê” (Luk.2:11,12).

Met jou betraande oë en jou bang onsekere hart kan jy dan ook tog saam met die engele sing: “Eer aan God in die hoogste hemel, en vrede op aarde vir die mense in wie God ’n welbehae het!” (Luk.2:14). Skep moed om te weet dat God nog in beheer is. God in die hoogste hemel gee nog vir mense op hierdie stukkende aarde om. Hy bring vrede, waar jy jou vrede verloor het. 

Kersfees bring hoop, want Christus Jesus is God wat uit die hoogste hemel na ons toe gekom het op die heel laagste plek van die aarde, in die mees uiterste en ellendigste omstandighede, en hier tussen ons kom woon het en al ons probleme op Hom geneem het. Hy is die bron van alle hoop (1Tim.1:1). Hy bring hoop vir alle nasies (Matt.12:21; Rom.15:12). Daarom bring Hy ook hoop vir jou en my, vandag, hier en nou! Dis hierdie hoop wat ons laat moed skep al lyk ons tye donker en die toekoms onseker.

Want Jesus se geboorte is nie net ’n historiese gebeurtenis wat ver in die verlede gebeur het en in die ou geskiedenis vasgelê is nie. Nee, dit het ’n blywende effek en ’n astronomiese verandering in die wêreld gebring wat aanhou vir altyd. Sy koms het vir ons lewe gebring, en dit in oorvloed (Joh.1:16;1 Joh.1:2). 

Daarom kan jy vandag moed skep. God het gekom in die krip van jou hart en huis. Hy maak daarvan ’n paleis sodat Hy deur sy Gees altyd in jou sal wees.

So ’n Kersfees wil ons vir jou toewens: ’N KERSFEES MET NUWE HOOP!

Attie Beetge

Stellenbosch. 2021 

 _____________________

Attie Beetge se nuwe boek, "EMOSIES - Gedigte, Gedagtes en Gebede vir elke faset van die lewe", is vanaf 10 Desember beskikbaar. Slegs R100 plus koerierkoste, by jou afgelewer. Betaal eers nadat jy boek ontvang het en tevrede is. As jy nie tevrede is met boek nie, stuur dit terug op my koste. Bestel ‘n paar vir kersgeskenke. 

0842094750

attiebeetge@gmail.com