Terug na November 2023  - Nuusbrief Indeks

Oordenking: Vertrou op die Here

Deur ds. Dawie Scheepers

Kimberley

2 Kron. 20:13-27 (20)

Die afgelope paar jare was moeilike jare. Eers was dit Covid en daarna het die Russies-Oekraïnse oorlog uitgebreek, en nou is die Israeli - Palestynse krisis.

Of dit nie genoeg is nie bevind ons ons in ‘n ekonomiese krisis. Nie net skiet die pryse van kos en noodsaaklike goedere die hoogte in nie, maar alles breek rondom ons. Daar is die kragkrisis, die water kom nie by ons huise uit nie en ons paaie is in ‘n toestand. Om dit te vererger is daar gerugte van veldbrande, oorstromings, windskade en droogte. Ons voel totaal verlore.

Israel bevind hom in dieselfde slegte posisie in 2 Kron. 20. Die Moabiete, Ammoniete en Meüniete het opgetrek teen koning Josafat van Juda om oorlog te maak. Die oormag het die voortbestaan van God se volk bedreig. Toe staan die Leviet Jagasiël op en sê: “Julle moenie bang wees of julle laat afskrik deur hierdie groot menigte nie, want dit is nie julle geveg nie, maar God s’n.”

Dan volg daar drie belangrike gebeure:

1. Hulle het na God gegaan en voor Hom gestaan en gevra: “Ons weet nie wat om te doen nie, maar ons kyk op na U vir hulp”. Die woorde weerspieël ‘n gevoel van totale hulpeloosheid. Daarom bely hulle hul afhanklikheid voor God. By Hom alleen moet ‘n mens hulp soek en dit is van groot waarde as ‘n mens magteloos is.
2. Hulle het in geloof opgetrek. Hierdie feit bly uit die afskeidswoorde van koning Josafat aan sy soldate: “Vertrou op die Here julle God, dan bly julle behoue.” Die volk se krag het in stil wees en vertroue gelê. God was hulle hoop.
3. En dan die uitkoms. Hulle het opgetrek om tot die dood toe te veg. Maar dan ontdek hulle dat God vir hulle geveg het. Hulle hoef net te aanskou. Die leërs van Ammon, Moab en die Meüniete het onder mekaar begin veg en mekaar uitgeroei. As God ingryp gebeur daar onverklaarbare dinge. Sy hulp sal ons nooit kan verklaar nie. Dan is daar uitbundige vreugde by Juda. Hulle het net rustig voortgegaan en God het hulle na alle kante toe rus gegee.

Josafat was ‘n wonderlike koning, iemand wat God in alles geken het, wat volgens God se verwagting wou leef. Daarom is hy vir ons ‘n aansporing. By hom kan ons leer dat stil vertroue ons lewe moet versier. Ons kan nooit te veel van God verwag nie. En God is boonop getrou. Hy sal alles op sy tyd en manier laat gebeur. Ons moet dit net kan raaksien en Hom voortdurend loof. Die lewe moet vir ons ‘n lied wees. Ons lewe is in Sy hande.

Terug na November 2023  - Nuusbrief Indeks