Terug na September 2022  - Nuusbrief Indeks

Ons Vrijheidsverhaal: Interaktiewe gids van die Voortrekkermonument

Die Voortrekkermonument is al sedert 1949 vir alle geskiedenisliefhebbers ‘n plek waar hulle kan tuisvoel en meer leer oor die Afrikanergeskiedenis.

’n Nuwe gids is verlede maand bekendgestel waarin die leser op ’n kulturele reis deur die Voortrekkermonumentterrein kan gaan; van die Groot Trek tot by ons splinternuwe Vrijheidsreis-uitstalling.

Dit is ook die eerste keer dat so ’n volledige gids nie net in vier Suid-Afrikaanse tale vertaal is nie, maar in agt tale! So word die storie wat ons vertel nie net toeganklik en eie vir Suid-Afrikaners nie, maar kan ook vir internasionale besoekers van waarde wees.

Honderde voorwerpe, besienswaardighede, artefakte en uitstallings op die monumentterrein word in hierdie gids saamgevat in meer as ‘n duisend pragfoto’s en interessante feite oor die Voortrekkermonument.

Dié gids neem die leser op ’n interaktiewe reis, met onder meer QR-kodes wat besoekers in staat stel om na videobeeldmateriaal te kyk en na klanke te luister terwyl hulle deur die monument stap.

Die Gelofte, wat ons so gewoond is om slegs in Afrikaans of Nederlands te sien en hoor, is ook vir die eerste keer in die geskiedenis van die Voortrekkermonument in soveel tale vertaal. Met behulp van dié gidse, kan die kern van die Afrikaner se storie, ons storie van hoop en geloof in God, internasionaal verkondig word en gedeel word met besoekers wat graag die storie van die Afrikaner wil verstaan.

Met jou gids in die hand, is daar nie meer enige geheime van die voorwerpe, monument, argitektuur, simboliek of geskiedenis wat nie vir jou ontbloot sal wees nie.

Vir dié wat nog nie so vertroud is met die geskiedenis nie, is die oorhoofse storie breedvoerig daargestel om ’n goeie idee van die prentjie te kry. Vir ander is die besonderhede nou weer belangrik en is die “dieper delf”-afdeling van die gids presies waarvoor hulle nog altyd gewag het!

𝐎𝐦 𝐣𝐨𝐮 𝐮𝐢𝐭𝐠𝐚𝐰𝐞 𝐭𝐞 𝐛𝐞𝐬𝐭𝐞𝐥, 𝐤𝐨𝐧𝐭𝐚𝐤 𝐯𝐢𝐫 𝐀𝐧𝐢𝐭𝐚 𝐃𝐮̈𝐩𝐩𝐞𝐫 𝐛𝐲 𝐚𝐧𝐢𝐭𝐚@𝐤𝐮𝐥𝐭𝐮𝐮𝐫𝐭𝐮𝐢𝐬𝐭𝐞.𝐨𝐫𝐠.𝐳𝐚 𝐨𝐟 𝐛𝐞𝐬𝐨𝐞𝐤 𝐨𝐧𝐬 by die Voortrekkermonument 𝐞𝐧 𝐤𝐫𝐲 𝐣𝐨𝐮 𝐤𝐨𝐩𝐢𝐞 𝐛𝐲 𝐨𝐧𝐭𝐯𝐚𝐧𝐠𝐬 𝐭𝐞𝐞𝐧 𝐬𝐥𝐞𝐠𝐬 𝐑𝟑𝟎𝟎 𝐩𝐞𝐫 𝐠𝐢𝐝𝐬!